२०८१ साल पुष ७ गते आइतबार
काठमाडौं I रेडियो नेपालले आफ्नो ७४औँ वार्षिकोत्सवका अवसरमा आज शास्त्रीय सङ्गीत सम्मेलनको आयोजना गरेकाे छ ।
सिंहदरबारस्थित रेडियो नेपालको कार्यालयमा आयोजित शास्त्रीय सङ्गीत सम्मेलनमा कलाकारहरु सुगमा गौतम, मनोज सिंह, प्रभुराज ढकाल, निमेश कपाली, धनबहादुर गोपाली र रामकुमार अर्याललगायतले गायन, सुरबादन र तालबादन प्रस्तुत गर्नुभयो ।
सम्मेलनको शुभारम्भ गर्दै रेडियो नेपालका कार्यकारी निर्देशक बुद्धिबहादुर केसीले रेडियो नेपालले स्थापना कालदेखि नै सबै प्रकारका गीत सङ्गीतलाई प्राथमिकता दिँदै आएको बताउनुभयो ।
कार्यकारी निर्देशक केसीले मुलुकका चर्चित कलाकारहरूको मूल केन्द्रको रुपमा रहेको रेडियो नेपालले सार्वजनिक प्रसारण सेवामा रूपान्तरण भएपछि पनि गीत सङ्गीतलाई उत्तिकै प्राथकितामा राख्ने प्रतिबद्धता जनाउनुभयो ।
सङ्गीत सम्मेलनमा रेडियो नेपालका नायव कार्यकारी निर्देशक खगेन्द्र खत्रीले नेपाली सङ्गीतलाई विश्वमा चिनाउन योगदान गर्ने कलाकार जन्माएको रेडियो नेपाल निरन्तर कला र सङ्गीतको प्रवद्र्धनमा लागिपरेको बताउनुभयो ।
सङ्गीत सम्मेलनमा रेडियो नेपालका सङ्गीत शाखा प्रमुख मनराजा नकर्मीले नेपालको आधुनिक गीतसङ्गीतको विकासमा रेडियोले पुर्याएको योगदान उल्लेखनीय भएको बताउनुभयो ।
चैत २० गते हुने रेडियो नेपालको ७४ औँ वार्षिकोत्सवको अवसरमा रेडियो नेपालले आधुनिक गीत प्रतियोगिताको पनि आयोजना गर्दैछ ।
तस्बिर : मिलन ढुंगाना
