२०८३ साल असार ७ गते आइतबार
काठमाडौँ । प्रधानमन्त्री शेरबहादुर देउवाले अत्याधुनिक डिजिटल प्रविधिलाई अँगाल्दै समयसापेक्ष प्रसारण गर्नु रेडियो नेपालको अबको कार्यभार भएको बताउनुभएको छ ।
रेडियो नेपालको ७२औँ वार्षिकोत्सवको अवसरमा शुभकामना सन्देश दिनुहुँदै प्रधानमन्त्री देउवाले सुसूचित हुने जनताको हकको सुनिश्चित गर्न रेडियोले जनताका पिर मर्का बुझेर उनीहरूकै बोली बोल्नुपर्ने बताउनुभयो ।
सन्देशमा प्रधानमन्त्री देउवाले रेडियो प्रसारणको जननी संस्था रेडियो नेपालले मुलुकको हरेक राजनीतिक र सामाजिक परिवर्तनमा महत्त्वपूर्ण भूमिका निर्वाह गरेको उल्लेख गर्नुभएको छ ।
उहाँले विचार र अभिव्यक्तिको स्वतन्त्रता हाम्रो संविधानले प्रत्याभूत गरेका आधारभूत कुरा भएको उल्लेख गर्नुहुँदै मौलिक हक अन्तर्गतको सूचनाको हकप्रति सरकार सदैव जिम्मेवार र प्रतिबद्ध रहेको उल्लेख गर्नुभएको छ ।
देशका हरेक विपत्ति र सङ्कटका समयमा रेडियो नेपालले खेलेको भूमिका प्रशंसायोग्य रहेको उल्लेख गर्नुहुँदै प्रधानमन्त्री देउवाले भूकम्प, बाढी–पहिरो र महामारीजस्ता विपत्मा रेडियो नेपालले भरपर्दो सूचना र जानकारी प्रवाह गरेर राष्ट्रिय दायित्व निर्वाह गरी सार्वजनिक प्रसारणको छनक दिइसकेको उल्लेख गर्नुभएको छ ।
जनताका आधारभूत आवश्यकता पूरा गरी सुन्दर नेपाल बनाउनु नै सरकारको मुख्य कार्य रहेको उल्लेख गर्नुहुँदै प्रधानमन्त्री देउवाले आगामी दिनमा रेडियो नेपाललाई गुणस्तरीय सामग्री उत्पादन, प्रस्तुति र प्रसारणमा सफलता मिलोस् भनी शुभकामना व्यक्त गर्नुभएको छ ।
