२०८३ साल असार ७ गते आइतबार
काठमाडौँ । रेडियो प्रसार सेवा विकास समिति रेडियो नेपाल र नेपाल दूरसञ्चार कम्पनी लिमिटेड नेपाल टेलिकमबिच व्यावसायिक तथा सूचना सन्देश प्रसारण गर्ने सम्झौता भएको छ ।
रेडियो नेपालको केन्द्रीय साथै सबै प्रादेशिक प्रसारण संस्थाहरूमार्फत विभिन्न मातृ तथा स्थानीय भाषामा टेलिकम सम्बन्धी सूचना सन्देश प्रसारण गर्ने सम्झौता भएको हो ।
सम्झौता पत्रमा हस्ताक्षर गर्नुहुँदै रेडियो नेपालका कार्यकारी निर्देशक अमरध्वज लामाले रेडियो नेपालले सूचना, सन्देशहरूलाई आम नागरिक माझ बढी ग्राह्य बनाउनका लागि विभिन्न मातृ भाषाको प्रसारणलाई प्राथमिकता दिइएको बताउनुभयो ।
कार्यकारी निर्देशक लामाले नागरिकप्रति प्रभावकारी सेवा प्रवाह गर्न रेडियो नेपाल र नेपाल टेलिकमबिचको सहकार्य र साझेदारी महत्वपूर्ण रहेको पनि बताउनुभयो ।
यस्तै नेपाल टेलिकमका प्रबन्ध निर्देशक संगीता पहाडी अर्यालले ऐतिहासिक प्रसारण संस्था रहेको रेडियो नेपालको प्रसारण मार्फत दूर दराजका नागरिकसम्म आवश्यक सूचना सन्देशहरू पुर्याउन सहयोग पुर्याइरहेको बताउनुभयो ।
प्रबन्ध निर्देशक अर्यालले नेपाल टेलिकमको सेवा प्रवाहलाई अझ प्रभावकारी बनाउन रेडियो नेपालको भूमिका महत्वपूर्ण रहेको पनि बताउनुभयो ।
