२०८३ साल असार ७ गते आइतबार
पाल्पा । रेडियो नेपालले पाल्पाको बगनासकाली गाउँपालिका—९ को बगनास डाँडाबाट एफएम रिले स्टेशन स्थापना गरी आजदेखि प्रसारण सुरु गरेको छ ।
रेडियो नेपालले बगनासबाट ५०० वाट क्षमताको एफएम ट्रान्समिटर जडान गरी प्रसारण सुरु गरेको रेडियो नेपाल प्रादेशिक प्रसारण केन्द्र पोखराका कार्यालय प्रमुख सुरेन्द्रप्रसाद यादवले बताउनुभयो । नेपाल टेलिभिजनसँगको सहकार्यमा टावर, भवनसहित अन्य भौतिक संरचना प्रयोग गरी एफएम रिले प्रसारण आरम्भ गरिएको हो ।
देशका सबै भू–भागमा प्रसारण पहुँच पुर्याउने लक्ष्य राखेको रेडियो नेपालले ३२ औं रिले स्टेसनका रुपमा पाल्पाको बगनासमा एफएम स्टेशन स्थापना गरेको रेडियो नेपालका कार्यकारी निर्देशक बुद्धि बहादुर केसीले जानकारी दिनुभयो ।
एफएम ब्यान्डको १०३ मेगाहर्जमा सुरु गरिएको याे रिले प्रसारणबाट पाल्पा र स्याङ्जा जिल्लाका साथै गुल्मी, अर्घाखाँची, बाग्लुङ्ग, पर्वत, नवलपरासी र रुपन्देहीका केही क्षेत्रमा रेडियो नेपाल स्पष्ट सुन्न सकिने छ ।
बगनास, पाल्पाकाे एफएम रिले स्टेशन जडान कार्यका लागि रेडियो नेपालका उप निर्देशक तथा प्रादेशिक प्रसारण केन्द्र पोखराका कार्यालय प्रमुख सुरेन्द्रप्रसाद यादवको नेतृत्वमा टोली खटिएको थियो । जसमा वरिष्ठ प्राविधिक अधिकृत जगदीश शर्मा, वरिष्ठ प्राविधिक सहायक गोविन्द पाठक, टोपराज पुरी, वीर बहादुर थापा तथा पाल्पा जिल्ला संवाददाता बिष्णु खनाल लगायत संलग्न हुनुहुन्थ्यो ।
