२०८१ साल मंसिर ६ गते बिहीबार
काठमाडौँ । रेडियो नेपालले आज रेडियो प्रसारणमा महिला सशक्तीकरण र तीज विषयक कार्यक्रम आयोजना गर्यो ।
केन्द्रीय कार्यालय सिंहदरबारमा रेडियो नेपाल र दिदीबहिनी समूहले आयोजना गरेको विशेष कार्यक्रममा उद्योग वाणिज्य तथा आपूर्ति मन्त्रालयका सहसचिव राधिका अर्यालले महिलाका विषयका बनेका कानुनहरू कार्यान्वयन नहुँदा अझै महिलाहरू अवसरबाट वञ्चित हुनुपरेको बताउनुभयो ।
उहाँले महिला सशक्तीकरणका लागि महिलाहरू आर्थिक रुपमा सबल र सक्षम हुनुपर्नेमा जोड दिनुहुँदै कानूनले व्यवस्था गरेका अधिकार प्रयोग गरेर महिलाहरू अघि बढ्नुपर्ने बताउनुभयो ।
कार्यक्रममा पत्रकार तथा महिला अधिकारकर्मी बबिता बस्नेतले महिलाहरू दोहोरो जिम्मेवारी पूरा गरेर पनि कार्यक्षेत्रमा अब्बल देखिन थालेकोमा खुसी व्यक्त गर्नुभयो ।
रेडियो नेपालका कार्यकारी निर्देशक बुद्धिबहादुर केसीले रेडियो नेपालको प्रसारण पहुँच दूरदराजका श्रोतासम्म पुग्ने हुँदा प्रसारणका माध्यमबाट महिलाको सशक्तीकरण गर्न सकिने विचार व्यक्त गर्नुभयो ।
रेडियो नेपालका नायव कार्यकारी निर्देशक खगेन्द्र खत्रीले पछिल्लो समयमा महिलाहरू नेतृत्वमा स्थापित हुने क्रम बढेको बताउनुभयो ।
कार्यक्रममा रेडियो नेपाल दिदीबहिनी समुहका अध्यक्ष रमा पराजुली (भुर्तेल), पूर्व कर्मचारीको तर्फबाट सूर्यकुमारी पन्त, वरिष्ठ कार्यक्रम अधिकृत चन्दा विष्ट र संवाददाता यशोदा अधिकारीले तीज पर्वका नाममा हुने विकृति विसङ्गतिलाई हटाई राम्रा पक्षहरूको अनुशरण गर्नुपर्नेमा जोड दिनुभयो ।
त्यस अवसरमा सेवा निवृत्त कर्मचारीहरू चन्द्रकला शाह र निलम श्रेष्ठलाई सम्मान तथा बिदाइ गरिएको थियो ।
