२०८३ साल असार ७ गते आइतबार
काठमाडौँ । रेडियो नेपालले डोटी, सिलगढीको उडितोलाबाट आजदेखि एफ एम ब्यान्डको १०० मेघाहर्ज (MHZ) मा परीक्षण प्रसारण शुरु गरेको छ ।
प्रारम्भिक अध्ययन अनुसार यो रिले प्रसारणबाट सुदुर पश्चिम प्रदेशका अछाम, डोटी, डडेलधुरा र बैतडीका धेरै स्थान तथा आसपासका क्षेत्रमा रेडियो नेपालको प्रसारण स्पष्टसँग सुन्न सकिने जडानमा संलग्न प्राविधिकहरु बताउँछन् ।
१५ औँ पञ्चवर्षीय योजनाको अवधिभित्र देशको शतप्रतिशत भू–भागमा रेडियो नेपालको पहुँच विस्तार गर्ने लक्ष्य अनुरूप नै यो रिले स्टेशनको परीक्षण प्रसारण शुरु गरिएको कार्यकारी निर्देशक बुद्धिबहादुर केसीले जानकारी दिनुभयो ।
डोटी, सिलगढीको उडितोलासहित सुदूरपश्चिम प्रदेशमा कैलालीको बुढीतोला, बैतडीको खोड्पे, दार्चुलाको छापरी र बझाङको राजकोट गरी ५ स्थानमा एफ एम ब्यान्ड मार्फत् रेडियो नेपालले आफ्नो सेवा सञ्चालन गरिरहेको छ । यसबाहेक, सुदूर पश्चिम प्रदेश प्रसारण कार्यालय, दिपायल, मियिडम वेभ ८१० किलो हर्जबाट पनि रेडियो नेपालले आफ्नो सेवा दिइरहेको छ ।
यो पछिल्लो स्टेशनसँगै रेडियो नेपालले हालसम्म देशभरि २५ वटा एफ एम स्टेशन, ६ वटा मिडियम वेभ (MW) स्टेशन र अनलाइन मार्फत् पनि आफ्नो सेवा सुचारु गरिरहेको छ ।