पर्खनुहोस वेबसाईट खुल्ने क्रममा छ।

स्वदेश आउन चाहनेका लागि आवश्यक प्रबन्ध गरियोस्ः काँग्रेस

radionepal

काठमाडौं । प्रमुख प्रतिपक्षी दल नेपाली काँग्रेसले विश्वभर कोरोना भाइरसको सङ्क्रमण फैलिएको विषम परिस्थितिमा विदेशमा अलपत्र परेका स्वदेश आउन चाहने नेपालीलाई तत्काल आवश्यक प्रक्रिया पूरा गरी नेपाल ल्याउने प्रबन्ध गर्न सरकारसँग आग्रह गरेको छ ।

काँग्रेस केन्द्रीय सदस्य एवं जनसम्पर्क समन्वय विभाग प्रमुख गोविन्द भट्टराईले आज प्रधानमन्त्री केपी शर्मा ओलीलाई पत्र लेख्दै रोजगारी, अध्ययन वा अन्य कुनै पनि काममा विश्वका जुनसुकै मुलुकमा गएका नेपालीको स्वास्थ्यका बारेमा सरकारले चासो लिइ उनीहरुको हितमा आवश्यक कदम चाल्न आग्रह गर्नुभएको हो ।

उहाँले कोरोना भाइरस सङ्क्रमणका कारण विश्व अर्थतन्त्रमै गम्भीर समस्या उत्पन्न भएको अवस्थामा विभिन्न देशमा रहेका नेपाली, जो नेपाल आउन चाहन्छन्, उनीहरुलाई तत्काल कूटनीतिक पहल गरी नेपाल ल्याउने व्यवस्था गर्न आग्रह गर्नुभएको छ ।
 
नेता भट्टराईले नेपाल प्रवेशका लागि सिमानासम्म पुगेका नेपाली नागरिकलाई नेपालभित्र क्वारेन्टाइन बनाएर राख्नुपर्ने र विदेशमा रहेका केही नेपालीको प्रवेशाज्ञाको समस्याका सन्दर्भमा त्यस्ता नेपालीलाई नेपाल ल्याउने वा निश्चित समयका लागि प्रवेशाज्ञा थप्न तत्काल कूटनीतिक पहल गर्नुपर्ने आग्रह गर्नुभएको छ ।

साथै आवश्यक स्वास्थ्य सामग्री तत्काल खरिद गरी कोरोनाविरुद्धको तयारी चुस्त बनाउन, स्वास्थ्य सामग्रीको गुणस्तरमा अन्तरराष्ट्रिय मापदण्ड पूरा गरेर मात्रै खरिद गर्ने गरी मापदण्ड बनाउन आग्रह गरिएको छ ।

यसैगरी महाव्याधी लम्बिँदै गयो भने वैदेशिक रोजगारीमा जाने नेपालीको रोजगारी गुम्ने खतरा रहेको उल्लेख गर्दै त्यसको पूर्वतयारीस्वरुप सरकारले अहिले नै उनीहरुका लागि रोजगारीको विशेष कार्यक्रमको तयारी शुरु गर्न आवश्यक रहेको पत्रमा उल्लेख छ ।
रासस