पर्खनुहोस वेबसाईट खुल्ने क्रममा छ।

आयोगका पदाधिकारीद्वारा सपथ    

काठमाडौँ । सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगका पदाधिकारीले आज पद तथा गोपनीयताको सपथ लिनुभएको छ ।

सर्वोच्च अदालतमा आयोजित समारोहमा प्रधानन्यायाधीश चोलेन्द्रशमशेर जबराले सत्य निरुपण तथा मेलमिलाप आयोगका नवनियुक्त अध्यक्ष डा गणेशदत्त भट्ट र बेपत्ता पारिएका व्यक्तिको छानबिन आयोगका नवनियुक्त अध्यक्ष युवराज सुवेदीलाई पद तथा गोपनीयताको सपथ गराउनुभएको हो ।     

सोही अवसरमा प्रधानन्यायाधीशको उपस्थितिमा सत्य निरुपण तथा मेलमिलाप आयोगका अध्यक्ष डा भट्टले नव नियुक्त सदस्यहरु प्रचण्डमान प्रधान, डा गोविन्द गौतम, मन दाहाल र विष्णु पोखरेल तथा बेपत्ता पारिएका व्यक्तिको छानबिन आयोगका अध्यक्ष सुवेदीले नवनियुक्त सदस्यहरु विश्वप्रकाश भण्डारी, गङ्गाधर अधिकारी, सुनिल रञ्जन सिंह र सरिता थापालाई पद तथा गोपनीयताको सपथ गराउनुभयो  ।     

सर्वोच्च अदालतका पूर्वप्रधानन्यायाधीश ओमप्रकाश मिश्रको संयोजकत्वमा गठित पदाधिकारी सिफारिस समितिले नाम सिफारिस गरेपछि उहाँहरुलाई सरकारले नियुक्त गरेको हो । 

पदाधिकारीको नियुक्तिसँगै गत चैतदेखि रिक्त रहेको दुवै आयोगले पूर्णता पाएका छन् ।     

कानून, न्याय तथा संसदीय मामिलामन्त्री भानुभक्त ढकालसँग दुवै आयोगका नवनियुक्त पदाधिकारीले आज भेट गर्नुभएको छ ।     

भेटमा मन्त्री ढकालले दुवै आयोगले ऐनद्वारा निर्धारित आफ्नो काम समयमा सफलतापूर्वक सम्पन्न गरी शान्ति प्रक्रियालाई तार्किक निष्कर्षमा पु¥याउन पदाधिकारीलाई आग्रह गर्नुभयो । उहाँले आयोगका काम कारवाहीमा सरकार तर्फबाट पूर्ण रुपमा सहयोग हुने प्रतिबद्धता व्यक्त गर्नुभयो ।