पर्खनुहोस वेबसाईट खुल्ने क्रममा छ।

फरार अभियुक्त १६ महिना पछि पुर्पक्षको लागि थुनामा

किरण श्रेष्ठ

तनहुँ । जिल्ला प्रहरी कार्यालय तनहुँले १६ महिना पछि खुकुरी प्रहार गरि फरार एक जनालाई पक्राउ गरेको छ । प्रहरीले तनहुँको भिमाद नगरपालिका वडा नं ६ बाट म्याग्दे गाउँपालिका वडा नं ५ थाङ्दीका वर्ष २० का बिशाल सुनारलाई फेला पारी पक्राउ गरेको हो ।  
गत २०७४ फागुन ९ गते म्याग्दे गाउँपालिका वडा नं ६ स्थित पिपलटारमा सन्जिब राई समेतका व्यक्तिहरुलाई धारिलो हतियार खुकुरी समेतले प्रहार गरी सख्त घाईते तुल्याएको घटनामा संलग्न रहेको भन्दै प्रहरीले सुनारलाई पक्राउ गरेको हो ।
लक्ष्मी राई समेतको जाहेरीले बादी नेपाल सरकार प्रतिबादी मिलन पौडेल समेत भएको ज्यान मार्ने उद्योग मुद्दाको वारदात पश्चात फरार रहेका प्रतिवादीहरुको खोजतलास प्रहरीले जारी राखिएको थियो ।
उक्त घटनामा संलग्न भई फरार रहेका बिशाल सुनार भिमाद एरियामा रहेको भन्ने गोप्य सुचनाको आधारमा मिति गत मंगलबार उक्त क्षेत्रमा प्रहरी परिचालन भई खोजतलास गर्दा सुनारलाई फेला पारी पक्राउ गरिएको जिल्ला प्रहरी कार्यालय तनहुँका प्रहरी नायव उपरीक्षक लिलाराज लामिछानेले जानकारी दिनुभयो । 
सुनारलाई आबश्यक कार्बाहीको लागि जिल्ला अदालत तनहुँ समक्ष उपस्थित गराईएकोमा अदालतको आदेशानुसार पुर्पक्षको लागि कारागार थुनामा गएको डिएसपी लामिछानेले बताउनुभयो ।