पर्खनुहोस वेबसाईट खुल्ने क्रममा छ।

पर्यटकका लागि स्मार्ट कार्ट लागू गर्न तयारी शुरु

सोलुखुम्बु, ७ भदौ । सगरमाथाको फेदी भनेर चिनिने खुम्बु पासाङ ल्हामु गाउँपालिकाले पर्यटकका लागि स्मार्ट कार्ट लागू गर्न तयारी शुरु गरेको छ । 

गाउँपरिषद्का क्रममा सो गाउँपालिकामा प्रवेश गर्ने सबै विदेशी पर्यटकलाई स्मार्ट कार्डमा आबद्ध गर्ने निर्णय गरेअनुरुप स्मार्ट कार्डका लागि प्रक्रिया अघि बढाइएको खुम्बु पासाङल्हामु गाउँपालिकाका अध्यक्ष ङिमदोर्जी शेर्पाले जानकारी दिनुभयो । 

अध्यक्ष शेर्पाका अनुसार खुम्बु प्रवेश गरेका पर्यटक बेपत्ता हुने तथा सुरक्षामा चुनौती बढ्दै गएकाले पर्यटकको सुरक्षाका लागि यस्तो व्यवस्था गर्न लागिएको हो । 

उहाँका अनुसार पर्यटक खुम्बुको प्रवेशद्वार लुक्लामा प्रवेशलगत्तै उनीहरूलाई स्मार्ट कार्ड उपलब्ध गराउने र त्यो कार्ड बोक्ने पर्यटक कहाँ जाँदैछ भन्ने जानकारी लिइनेछ । 

वर्षमा औषत ३५ हजारको हाराहारीमा विदेशी पर्यटक आउने खुम्बुमा वर्षेनी तीन/चार जना पर्यटक हराउने गरेको प्रहरीको तथ्याँक छ भने उचाइमा हुने विभिन्न स्वास्थ्य समस्याका कारण आपत्कालीन उद्धार गर्नुपर्ने पर्यटकको संख्या समेत थुप्रै हुने गरेको छ । 

स्मार्ट कार्ड लागू भएपछि आपत्कालीन अवस्थामा उद्धार चाँडो हुने र पर्यटकले सुरक्षित महशुस गर्नेछन् ।