पर्खनुहोस वेबसाईट खुल्ने क्रममा छ।

जघन्य अपराधका मुद्दा फिर्ता भएको छैनः प्रधानमन्त्रीको सचिवालय 

काठमाडौँ, ५ जेठ । प्रधानमन्त्री पुष्पकमल दाहाल ‘प्रचण्ड’को निजी सचिवालयले कैलालीको टीकापुरलगायतका स्थानमा भएका घटनामा संलग्न जघन्य अपराधका दोषीहरूको मुद्दा फिर्ता नहुने स्पष्ट गरेको छ ।

सचिवालयले आज एक विज्ञप्ति प्रकाशित गर्दै जघन्य अपराधका घटनामा कुनै पनि मुद्दा फिर्ता नलिइएको र लिने अवस्था पनि नरहेको जनाएको छ । 

बिहीबारको मन्त्रिपरिषद् बैठकले तराई–मधेस आन्दोलनलाई राजनीतिक आन्दोलनका रूपमा स्वीकार गर्ने विषयमा गरेको निर्णयलाई लिएर सञ्चारमाध्यममा आएका समाचारबारे प्रतिक्रिया दिँदै प्रधानमन्त्रीको सचिवालयले जघन्य अपराधका दोषीको मुद्दा फिर्ता लिने सरकारी निर्णयसम्बन्धी प्रकाशित समाचारको खण्डन गरेको हो ।

मन्त्रिपरिषद्को बैठकले टीकापुरलगायतका हत्याका घटनामा संलग्न नभएका तर आशंका र पूर्वाग्रहकै आधारमा झुट्ठा मुद्दा लगाइएका व्यक्तिहरूका मुद्दा कानुनबमोजिम मिल्ने गरी फिर्ता गर्ने प्रक्रियाको गृहकार्य थाल्न कानुन मन्त्रालयको परामर्शमा गृह मन्त्रालयलाई निर्देशन दिएको थियो ।

दोस्रो चरणको स्थानीय तह निर्वाचनको वातावरण बनाउन भन्दै सरकारले घटनामा असंलग्नहरूमाथि लगाएका झुट्ठा मुद्दा कानुनबमोजिम फिर्ताको प्रक्रिया थाल्ने निर्णय गरेको थियो । 

प्रधानमन्त्री सचिवालयले दोस्रो चरणको निर्वाचन बाँकी नै रहेकाले संयमित भएर निर्वाचनको तयारीमा जुट्नसमेत सबैमा अपिल गरेको छ ।